كتبت نور علي أبو ندى على حسابها الشخصي على موقع انستغرام:

عارفين لأي درجة بكره فكرة الفراق
لدرجة لما أسمع عن الفنانين والفنانات انهم انفصلوا بزعل كتير
ياسمين صبري وأبو هشيمة
هنا الزاهد وأحمد فهمي
وكتير مشاهير
وبحياتي ما تخيلت انه انا وزوجي نبعد عن بعض
بكل مرة بيسافر فيها بحاول أخبي الدموع لما حد يسألني كيف انتي والولاد وشو عاملين.. وسفره بيكون شهر او تنين مش مدة طويلة
بعيش الغُربة وانا بين أهلي لو بعد شوي
وبعيش ع أطلال إني أحسب كل يوم بيمضي وأصبر حالي وأقول هانت ضايل ٢٣ يوم .. ضايل ٢٢ يوم.. ضايل ٢٠
وبكون فعليا حالي بيحزِن
ولحد ما يوصلنا بترجعلي البهجة من جديد و بترجع البسمة ولمعة العيون …
بحاول أخبي ضحكتي الي ما بتتخبى لما ييجوا الأهل يسلموا عليه بعد ما وصللنا بالسلامة ..
وكل ما ألمح حد بطلع بعنيا بنزلهم.. بخاف يشوف اللمعة ويلاحظ قدي مبسوطة وفرحانة ووجهي نوّر
وبخجل من حبي الواضح وبحاول أخبي لكن "الشمس ما بتتغطى بغربال "
كانت حياتنا حلوة ومبسوطين …..
انا راضية ومؤمنة بقضاء ربنا ومتأكدة انه سبقنا عالجنة بإذن الله
وانه عاش بطل وراح بطل وهو بيساعد وبيسعف الناس ..
وانه شهادته شرف عظيم بيتورث
بس والله الفراق صعب.. صعب كتير انو ننحرم من طلته البهية ووجهه الحلو وصوته وضحكته ومزحه وحنانه وريحته ووجوده بحياتنا
صعب كتير أتقبل أفرح من قلبي بأي مناسبة أو نجاح بدونه
صعب ..
المسؤولية أنا واثقة بربنا اني حكون قدها.. بس البعاد
والفراق الي بكرهه من بعيد للغريب قبل القريب.. ربنا يقويني عليه
يا رب صبرني وقدرني وخليني اشوفه بالمنام دايما
Belal Abu Saman