أنا مش رقم!
المصور
محمد أحمد الهوبي
المكان
رفح
تاريخ الحدث
2021-05-18
اسم الباحث
لمياء عصام محمد
كتب محمد أحمد الهوبي عبر حسابه الشخصي على موقع فيسبوك:
مرحباً..
أنا محمد احمد الهوبي عايش في مخيم بمدينة رفح جنوب قطاع غزة، عمري 20 سنة بدرس بكلية الإعلام بجامعة الأقصى _قسم الاذاعة والتلفزيون مستوى ثالث "فاضل على تخرجي شويّة بسيطة كدة" بس مش دة المهم..
خلال هالأقل من ربع قرن يلي عشتهم عشت وشفت خلالهم أكثر من حرب وتصعيد "2008_2012_2014 _واللي بنعيشها الآن أصعب وأعتى من سابقاتها" يعني تقدر تقول كدة مختّم بكالوريس(4) حروب.
زيي زي كل سكان هالمنطقة الصغيرة يلي يدوب تيجي 365 كيلو متر بنستنى لتخلص هالحرب أو "الجولة منها" عشان نرجع نرجع لحياتنا طبيعي اللي هي أساساً مش طبيعية وبتشبه أي شي إلّا حياة البشر الطبيعيين.
أنا صاحب #حلم، و#قصة، و#رسالة، و#حدوتة مختلفة بسعى إلهم جاهداً ومؤمن بالضو البسيط اللي يدوب مبيّن بين كل هالظلام والعتمة اللي عايشينها وواثق إني بيوم هالضو رح ينور عليّا.. كل هالحكي لحد الآن تمام بس في غيري كتير كتبوه وبعدها ربنا اختارهم وما كانو عارفين مصيرهم رح يكون بدري وم لحقو يعملو شي من مخططاتهم والحياة لسا ما أعطتهم شي حلو.. بس الأكيد إن هما مش أرقام..
و#أنا_مش_رقم أنا بتمنى من الله يعطيني العمر والقوة والصبر لأبلش وأكمل اللي بلشت فيه ورجليا خطت أول سُلّمة في حياتي فيه وبتمنى ما أصير ولا أكون مجرد رقم وأقدر أكون مثال لقصة نجاح بلشت من تحت الركام وشقت طريقها "لوحدها" بدون سند حد ليّا وما كانت مجرد رقم.
توضيح:
كتب محمد الهوبي هذا النص بتاريخ 18 مايو 2021، أثناء حرب غزة 2021 التي عُرفت في فلسطين باسم "معركة سيف القدس"، نال النص انتشارًا واسعًا بعد استشهاد محمد بتاريخ 17 مايو 2024.
