كتب شجاع الصفدي على حسابه الشخصي على موقع فيسبوك:
تشرب شاي؟ ،
-....
-مالك صافن ؟ بأحكي معك .
-ماشي ،بأشرب ،شكرا .
-هدنة؟
-م هُدناش
-خليك متفائل
-حاضر ،تفاءلت.
-عارف سألت الذكاء الاصطناعي متى تنتهي حرب غزة .
-منيح، وشو جاوب
-ضل صافن زيك، أنت وجي بي تي ضدي .
-شو قولك فينا نرجع؟
-للأماكن ممكن نرجع، لكن مثل ما بيقولوا من يعيد الرفاق؟
-صح من يعيد الرفاق ..
-أنا اكتأبت ، فهمني شو حنعمل في الهدنة.
-حنبكي ،فرصة نبكي ،عنا مخزون فائض من الدموع.
-فاكر شو كنت تحب سميح شقير ، وتشغل أغنيته ..
-رجع الخي؟
-ما رجع ،مات
-إن عشت فعش حرا أو مت كالأشجار وقوفا.
-كلام فاضي ، الشجرة اللي بتموت بتموت ، مش حتفرق واقفة أو صارت أبواب وكراسي ،ماتت يا حبيبي ماتت .
-برد ولا أنا بس بردان
-درجة الحياة ناقص واحد .
-شو عنا مسكنات وجع؟
-حسب الوجع،صداع؟
-فراق
-يا رجل ارحمني ، وبعدين معك.
-شو فايدة بعدين؟
-لا بعدين ولا قبلين،فينا نرجع بكرة؟
-يلعن الحرب والسياسة والهدنة.
-خلص شكلي أزعجتك بأسئلتي.
-لا أبدا ، فكرك فينا نرجع؟
-شو رأيك نقدم الساعة؟
-أو نرجع الزمن ؟
-لمتى؟
-ليلة الوداع ...
-طال السهر وقلي قلبي ،ايه الخبر قلت الحبايب هجروني ..
-الوردة دي ريحتك فيها ..أحفظها تذكار لهواكي .
-وين الوردة ،قطفوها ..
-ماتت
-ما تحكيها
-حاضر
-ما تبكي، امسح دموعك
-مش دمع، من البرد
-ونار الحرب
-درجة الحياة ناقص واحد !
-حنرجع بكرة !
-شو تأخر بكرة..
-بكرة هدنة ؟
-حتفرق؟
-لا .. بس .. أقلك مش عارفة، لازم يكتمل شي يوما
-اكتملنا بالنقصان
-فلسفتك قاتلة
-....
-تصبح على هدنة
-ادفي منيح ، الحياة في السالب باردة .
-.....
