أجرت شبكة الجزيرة لقاءً قصيرًا مع سيدة غزية تُدعى "عائشة خالد النجار" تضرر منزلها بفعل القصف الإسرائيلي المستمر على قطاع غزة..

الجزيرة شاركت اللقاء عبر صفحاتها الرسمية على مواقع التواصل الاجتماعي، تحت تعليق:

سيدة من غزة تعود لتتفقد منزلها لتجده بلا معالم

عائشة النجار، سيدة #من_غزة عادت لتتفقد منزل أحلامها فوجدته بلا معالم…

نص محتوى الفيديو

تقول السيدة عائشة خالد النجار في مقطع الفيديو:

زي ما أنتم شايفين يعني، هينا بنلملم أغراضنا، بنعيش كل شوي لحظات صعبة، ويا عالم نرجع.. ما نرجعش، نشوف البيت تاني.. تالت، مش عارفين، كابوس..

تخيلي طول الليل ما نمت، أنا والله كان زوجي أولها يجي يصور، يورجيني إياه، يلا بنعيش فيه.. بنكمل، لما جيت على الواقع غير تمامًا، غير غير، انصدمت.. انصعقت كمان، لدرجة قعدت وين بدي أطلع، وين بدي.. بطلت.. صرت سرحانة، وروحت ما عرفت ايش شفت بالضبط، من الصدمة والله..

هذه المعيشة وهذا المطبخ..

سؤال موجهة للمتحدثة: تتذكري ايش آخر طبخة عملتيها قبل الحرب؟

عائشة: برا.. كنت لساتني بعمل في الكوخ برا.. المنسف

طبعا فش شي جديد تهنيت عليه، التلاجة من 2014، لساتني جديد جايباها

هاي غرفة النوم، طبعا هاي بلكونة.. كنت عاملاها شي خيالي، نجيل وشغل برا، هاي مطبخ تحضيري عندي، هدا تحضيري غير اللي تحت، هدا للطبخ، طبعا شوفوا..

هدا المطبخ اللي كنت دايما أصور منه وأنزل على الإنستا، طبعا مفيش معالم، مفيش هنا معالم خالص..

هاي غرفة البنات، يعني مش قادرة أحكي لكم كيف كانت وكيف صارت، كيف كانت؟ مصدومين.. أنا مصدومة، ربنا يكون معانا بس؛ لأنه ربنا هو اللي شايف، قد ما حكينا على الفاضي، كل حرب بنحكي وما حدا سائل..