كتبت الصحفية يافا أبو عكر على حسابها الرسمي على موقع فيسبوك:

امتياز… مش رقم، امتياز حكاية

في الحرب، لما الأصوات العالية بتغطي على وجع القلب، ولما الأرقام بتتكاثر على الشاشات، بننسى أحيانًا إن كل رقم كان إنسان، وكان في ضحكة وعيون بتلمع، وكان في أم تحضن، وطفلة تحلم

امتياز أبو عكر، مش رقم
امتياز كانت طفلة بتضحك من قلبها، كأنها عم تحاول تنتصر على الخوف، أو كأنها شايفة شي إحنا ما بنشوفه.
كانت نازحة مع أمها، الشهيدة تسنيم أبو عكر، بنفس البيت اللي كنت فيه نازحة أنا عند اهلي
ضحكتها كانت غريبة، جنونية، فيها شي مش مفهوم…
سألتها أختي لينا مالك يا امتياز؟”
فردت أمها وهي تبتسم: “شايفة مقعدها بالجنة… شكلنا كلنا شهداء

ضحكنا معها، بس كان في شي بالخوف اللي بعيون تسنيم…
مع اشتداد القصف على مخيم خانيونس، واستهداف جيراننا، قالت
حاسّة إني هموت… بدي أكتب اسمي واسم بنتي على إيدي… خايفة نموت تحت الركام وما حدا يعرفنا
ضحكنا، وحكينا بنِعرفك يا تسنيم… بنعرفك

بس الحقيقة؟ كانت أصدق منّا كلنا
رحلت تسنيم، ورحلت امتياز ابنتها الوحيدة وراح معاهم عمها سعيد
بس ما راحوا لحالهم
راحوا وخلّوا وجع، وخلّوا ذكرى ما بتنمحى، وخلّوا رسالة
إن شهداءنا مش أرقام
امتياز كانت حياة، كانت ضحكة
واليوم هي عصفورة من عصافير الجنة
عند الله الرحيم… أحن من قاتلها، وأرحم من اللي خذلها

خانيونس
15/4/2025