كتبت إسراء سامي على حسابها الشخصي على موقع فيسبوك:

أنا إسراء من غزة وعمري 22 سنة، طالبة علم نفس على وشك التخرج "ادعولي أتخرج" متطوعة مع مؤسسة تامر لتقديم الدعم النفسي والترفيه للأطفال، صاحبة متجر لبيع الكتب أونلاين "سابقًا"، مشروع كاتبة رُبما، إنسانة كانت بتعافر عشان توصل لأحلامها والله وحده بيعلم قديش عانت وقديش كان المشوار صعب وشائك، واجت الحرب وهدمت كل اشي بنيته وأول الأشياء المهدومة هي إسراء نفسها..

صحباتي يلي بيعرفوني من قبل الحرب بيعرفوا قديش كنت بسيطة وفرفوشة وكيف كنت بشارك قصصي الهبلة وتفاصيل أيامي ونجاحاتي وانجازاتي وحتى تجاربي المؤلمة وانتكاساتي..

اجت الحرب وكعادتي كتبت كل يلي بصير هنا، عشاني عشان هالحساب هو بمثابة سيرة ذاتية إلي، دفتر يوميات.. عرفتوني وحبيتوني "شفتو كيف متأكدة من محبتكم؟" ولامست قلوبكم وكلامي ومشاعري وصلوكم وهنا صار عندي مسؤولية إنه أنا صوت من غزة قادر يعبر ويكتب ويوصل يلي بصير فصارت مهمتي أحكي عن كل اشي وانتو بتعرفوا إني حكيت عن أمور يمكن الناس بتنحرج تحكي عنها زي: المجاعة والأشياء يلي اضطرينا ناكلها وقتها، معاناة النساء مع الدورة الشهرية في ظل الحرب، معاناة الحمامات في النزوح، معاناة الخيام، وحرامية المساعدات ومسؤولين المخيمات وغيره كتير..

حاولت دايمًا أوصل الصورة زي ما هي بدون خجل من إني أحكيها وأعبر عن مشاعري، صرت مرآة غزة، كتير منكم بيحكولي إنهم عرفوا عن يلي بصير فعلًا من خلالي وهالاشي بطمني إني أديت مهمتي ووصلت صوتنا، صوت أكثر من مليونين بني آدم يُبادوا..

مؤخرًا في أشخاص بقولوا إني "بكاية ودراما" لمجرد إني بنقل صورة حياتنا الحالية يلي كل العالم وصلنا إلها مش بس الاحتلال، ما رح أحكي غير: يارب كل حدا حكا هيك كلام يعيش ويجرب يلي عشناه عشان يشوف الدراما على أصولها..

هيك صار فينا، وهي نكبتنا، أنا مش مسامحة أي حدا أذانا بهالحرب حتى لو أذى صغير وأنا خصيمتهم قدام ربنا يوم القيامة، وعند الله تجتمع الخصوم.

في الختام هي أنا، وهاد حسابي يلي رح تقرأوا فيه عن غزة وعن معاناة أهلها سواء في الشمال أو نازحين في الجنوب بمصداقية وشفافية، أهلًا وسهلًا فيكم جميعًا، وبدي أحكيلكم إني مُمتنة لوجودكم كلكم لأنكم دعم وسند..

وإن غبنا يومًا وغابت الأخبار فالدعاء وصية بيننا يا أصحاب