كتبت الصحفية وعد أبو زاهر على حسابها الرسمي على موقع فيسبوك:

كنت مروحة من دير البلح لخانيونس، التقيت بسيدة في منتصف الأربعينات. راكبة جنبي وبتبكي بتبكي بتبكي.

ما طاقتنيش الشربة، مسألهاش مالك

ردت عليا: اليوم عرس بنتي بس قلبي محروق، يما نار بقلبي .. سبتلهم العرس وطلعت، بديش حد يعرفلي طريق .. والله منا قادرة .. مش قادرة .. ولكو والله منا قادرة ايش بدكم مني.

يعني أنا فكرت إنه زي هالأمهات لمّا بناتهم بتزوجو .. مشاعر الأمومة.

وقلتلها:

هاي سنة الحياة يا خالة

قاطعتني:

يما قلبي محروق على أبويا واخواتي، حبايب قلبي .. يا ناس راحلي 15 واحد .. 15 هيك بلمح البصر

عن مين بدك احكيلك ابويا حبة عيني ولا اخواتي سند ظهري ولا عن نسوانهم الحناين ولا يا حبايب قلبي عن أولادهم اللي زي القمر .. قوليلي عن مين أقولك.

وفاتت بحالة جنون التعبير

ومن حوار لحوار خبرتني

عن إنه أخوها أسير أكثر من 20 سنة، طلع قبل الحرب بأشهر قليلة، واتزوج .. قبل استشهادهم بساعات رن عليها وقلها:

يختي أنا اليوم ملكت الدنيا كلها، فرحتي مش وسعاني، مرتي حامل .. بدي اصير "أبو" يختي .. زغرديلي... وزغردتله .. والله زغردتله

راح يا حبيب عمري

راح وهو نفسه يصير "أب"

بدك إياني أفرح

يحرم عليا ازغرد بعد زعرودته